BUTUAN CITY – Ipadayon gihapon ugmang adlawa ang pag-host sa lokal nga kagamhanan sa Bislig City, Surigao Del Sur sa 2018 Organic Asia Congress bisan paman sa pagpusil-patay sa asawa ni Mayor Librado Navarro kagabii sa may Barangay Poblacon sa maong siyudad.
Naila ang biktima nga si Carmencita “Tita” Tembling Navarro, 62 anyos. Sumala pa ni Mayor Navarro sa eksklusibong pakighinabi sa Bombo Radyo Butuan, pulitika ang motibo sa maong pagpamusil nga posibleng hinimo sa ka-agbat niya sa umaabot nga 2019 midterm election o kaha aron ebulabog o esabutahe ang international congress ugmang adlawa, ang 2018 Organic Asia Congress.
Sumala pa ni Mayor Librado, duna na siya’y nadawat nga sulat nga nag-ingong dunay bomba sa lugar diin ipahigayon ang maong congress og tungod sa tinguha nga esabutahe ang dakong kalihukan, gisundan kini sa pagpatay sa iyang asawa.
Bisan paman niini, ipadayon gihapon ang maong congress ilabina kay andam na ang tanan og siya lang man ang duna karuy problema.
Saysay pa sa mayor nga 30 segundos lang paghuman sa maong pagpamusil, naka-abot na sila sa lugar diin miapil pa sila ug gukod sa mga suspetsado apan wala na nila kini na-abte tungod sa kakusog sa dagan, gawas pa sa daghang crossing na pag-abot sa Mangagoy sa maong probinsiya.
Samtang gipahayag sa mayor nga kung naka-abot lang siya sa lugar adiser pa ang pagpamusil, posibleng dili mapatay ang iyang asawa o kaha malakip siya sa mahimong biktima.
Sa karun, paningkamutan nilang mailhan ang mga suspek.
Gipapangutana usab niini ang kapulisan kung asa sila niadtong higayona nga unta gipahugot naman ang seguridad sa maong siyudad ilabina kay nangabot na ang delegado para sa ugma nga congress.
Apan giklaro niining wala pa naka-abot ang augmentation support sa mga pulis nga nakatutuk sa pagabot sa mga langyaw nga delegado.
Sa karun, sabutan pa sa grupo ni Mayor Navarro kung kinsa ang mamahimong modagan isip mayor sa siyudad.
