BUTUAN CITY – Lisud nga mahitabo ang interim release kang kanhi Pangulong Rodrigo Duterte gikan sa pasilidad sa International Criminal Court.
Gipasabot ni political analyst Atty. Orly Vicente Montalban, namahayag na ang tigpamaba sa ICC nga kinahanglan ang kooperasyon sa gobyerno sa Pilipinas ugaling dunay mahitabong interim release aron maseguro nga available si Digong sa panahong ipatawag kini sa ICC.
Kumplikado matud pa kini tungod kay dili naman membro sa ICC ang Pilipinas samtang lisud usab nga makig-cooperate niini ang Philippine government tungod kay sila man gani ang nag-facilitate sa pagsurender sa kanhi.
Tungod niini, nanghinaot si Atty. Montalban nga unta dili lang interim release ang mahitabo kundi pagpagawas na gayud ni Digong gikan sa pasilidad sa ICC pinaagi sa pag-kuwestiyon sa hurisdiksiyon sa ICC gawas pa sa daghang kalapasan nga nakomitar sa pag-aresto niini.
Gipananglitan pa sa abogado ang nahitabong Maguindanao massacre diin 58 ka media personalities ang namatay sa usa lang ka insidente kondiin wala kini mi-abot sa ICC tungod kay nagpasabot lang nga naglihok ang korte sa Pilipinas.
Si political analyst Atty. Orly Vicente Montalban sa pakighinabi ning sibyahan.
