BUTUAN CITY – Gawas sa nahakot nga mga minor awards, korona, titulo, sashes og sponsor packages, gibitbit usab sa gikoronahang Mutya Hong Butuan 2018 nga si Mary Nicole Co ang cash prize nga sien-mil pesos (P100,000.00).
Sigon ni Paolo Gogo – tigpamaba sa lokal nga kagamhanan ning siyudad, mipatigbabaw ang ka-anyag, ka-utukan og kamaayo mupaso ni sa industrial engineer nga si Co gikan sa laing 24 ka mga ka-ubanan niining kandidata atol sa coronation night kagabii.
Samtang gikoronahang Ambassadress for Tourism si Keena Mae del Mar samtang si Mary Ann Pomoy ang gikoronahan isip Ambassadress for Culture, Arts and Heritage.
Gikoronahan usab isip Ambassadress for Youth and Education si Vlyx Rosal og Ambassadress for Peace and Development si Rowenzuri Ramos.
Ang mga napili usab nga ambassadress, nakadawat usab og cash prize nga tag 40-mil pesos samtang tag-15 mil pesos sa mga wala nangdaug nga mga kandidata.
Giklaro ni Gogo nga ang upat ka mga ambassadress, patas ang gihuptang papel bisan og managlahing titulo ang gitunol kanila.
Higayong dili matud pa mahimo sa Mutya Hong Butuan ang iyang katungdanan, ang lokal nga kagamhanan na ning siyudad moy magpili gikan sa upat ka mga ambassadress kung kinsa kanila ang ihulip pagka-mutya.
Ang Mutya Hong Butuan kada-tuig nga himuon isip kabahin sa mga kalihukan sa tinuig usab nga kapistahan ning siyudad nga mas nailang Balangay Festival 2018. (Beth Ruiz)
