BUTUAN CITY – Nanumpa na isip primero ministro sa India sa ikatulong higayon si Narendra Modi, lider sa Hindu Nationalist Bharatiya Janata Party (BJP).
Gipahigayon ang maong seremonyas sa Rashtra-pati Bhavan, ang opisyal nga pinuy-anan sa presidente sa India.
Ang National Democratic Alliance nga gipangulohan sa Bharatiya Janata Party ni Modi, nakadaog sa kinatibuk-ang eleksyon nga adunay 293 ka mga lingkuranan.
Liboan ka mga bisita ang mitambong sa iyang inagurasyon sa Presidential Palace diin lakip na ang mga lider sa Bangladesh, Nepal, Sri Lanka, ug Maldives.
Gipatuman ang hugot nga seguridad sa Delhi, diin gideklara ang no-fly zone ug adunay kapin sa 2,500 ka mga pulis ang gipakatap sa palibot.
Sa pagpamulong ni Modi, gisaad niining iyang suportahan ang soberanya ug integridad sa India ug magdumala uban ang tinuod nga pagtuo ug pagkamau-nongon sa konstitusyon. Ang 73-anyos mao lamang ang ikaduha nga lider sa India nga nakadaog sa ikatulo nga sunud-sunod nga termino sunod kang Jawaharlal Nehru.
