BUTUAN CITY – Gisugdan na sa Independent Commission on Infrastructure kon ICI ang turnover sa mga dokumento sa Office of the Ombudsman, human sa pamahayag ni Pangulong Ferdinand Marcos Jr. nga natuman na sa komisyon ang katuyuan niini.
Duha ka sakyanan sa pulisya nga dunay dalang mga dokumento mahitungod sa imbestigasyon sa matud pa anomalya sa flood control projects ang miabot sa buhatan sa Ombudsman sa Quezon City kagahapon, Marso 12.
Miabot usab si ICI Executive Director Brian Keith Hosaka para sa pakigpulong sa mga opisyal sa ahensya.
Mahinumdumang gitukod ang ICI pinaagi sa Executive Order No. 94 niadtong Setyembre 15, 2025, nga dunay probisyong mamahimong bungkagon ang komisyon ugaling matuman na ang tinguha niini.
Isip fact-finding body, nagpahigayon ang ICI og mga pagdungog, pagdawat sa testimonya, ug pagsusi sa mga ebidensya adiser magrekomenda og pagpasaka sa kaso sa Ombudsman o Department of Justice.
Niadtong Pebrero 6, gipa-atubang sa komisyon sa Malacañang ang ilang 125-day report nga nagresulta sa pagpahamtang og kaso batuk sa kapin usa ka dosenang indibidwal, lakip ang kanhe mga magbabalaod ug opisyal sa Department of Public Works and Highways (DPWH), ug pag-freeze sa kabtangan nga nagkantidad og kapin 25 bilyones pesos.
Sa katibuk-an, nakapagawas na ang ICI og siyam ka referral nga nagrekomenda sa kasong kriminal ug administratibo batuk sa 65 ka indibidwal, apil na ang mga opisyal sa DPWH, Commission on Audit, ug pipila ka contractor.
Sa kasamtangan bugtong si ICI chairperson Andres Reyes na lang ang nahabiling miyembro sa komisyon human mikanaog niadtong Disyembre ang duha ka commissioner nga sila Rogelio Singson ug Rossana Fajardo.
