BUTUAN CITY – Kampante si Anecita Pomoy, residente sa Purok 8, Brgy. Ong Yiu ning siyudad sa Butuan nga makuha sa iyang 33-anyos nga anak nga si Marcelito ang kampyunato sa America’s Got Talent: The Champions Finals.
Sa eksklusibong pakighinabi sa Bombo Radyo Butuan, gibutyag ni Anecita nga dako ang iyang pagsalig ngadto sa talento sa iyang anak sa pagkanta sukad pa niadtong mi-apil kini sa Pilipinas Got Talent.
Ang pag-apil ni Marcelito sa AGT iyang gikakurat tungod kay wala man kini misulti kaniya ug diha na lang niya kini nasayran dihang nakita na niya kini sa telebisyon. Sa pagkakaron hugot na ang iyang pag-ampo nga mulampos ang iyang anak sa iyang ambisyon rason nga nanawagan kini sa tanang mga Filipino nga i-ampo usab ang umalabot nga final showdown sa iyang anak batuk sa uban pang mga finalists.
Saysay pa ni Anecita, sa iyang bana kaniadto nagdako si Marcelito didto sa Brgy. Mangagoy, Bislig City sa lalawigan sa Surigao del Sur uban ang tulo pa niini ka mga igsoon.
Midayo siya sa Manila aron ma-abagan ang pagpadako kanila hangtud nga nagkabulag na sila sa iyang bana rason nga didto na siya nagpuyo sa Cavite dihang gikuha siya sa iyang kinamaguwangang anak nga naminyo na.
Nagkakita matud pa sila ni Marcelito dihang nag-edad na kini og 29-anyos human kini mi-apas kanila sa Cavite ug didto na gidasig sa ilang mga silingan nga mu-apil sa audition sa Pilipinas Got Talent human nakita ang pinasahi niining talento kansa maoy nagdala kaniya karon ngadto sa international stage.
Ang grand finals himuon karong Pebrero 10- oras sa Amerika ug sa Pebrero 17 mao na ang gikahinaman sa tanan nga ‘The Champions Results Finale.’
