BUTUAN CITY – Gisentensyahan og 40 ka tuig nga pagkapriso ang inahan sa duha ka Maute members nga si Ominta Romato o mas naila isip Farhana Maute- inahan nila ni Omar ug Abdullah Maute.
Sa 39 ka palid nga desisyon sa Taguig Regional Trial Court Branch 266, napamatud-ang sad-an ang maong inahan sa paglapas sa Section 4 sa Terrorism Financing Prevention and Suppression Act of 2012.
Nagtangag kini sa slot nga pagkabilanggo sa 17 ka tuig, upat ka bulan ug usa ka adlaw hangtod sa reclusion perpetua o 40 ka tuig nga pagkabilanggo. Gimandoan usab kini nga mobayad og P500,000 nga danyos sa korte. Nasuta usab sa piskaliya nga gigamit niini ang iyang kabtangan sa paghimo sa nasangpit nga kalihukan sa terorismo.
Kahinumduman nga niadtong 2017, nasikop si Ominta sa Lanao del Sur uban sa pipila ka mga miyembro sa Maute group, diin nakuha gikan sa mga niini ang pipila ka mga improvised explosive device sa giabandonar nga sakyanan duol sa checkpoint, kansang mga papeles, nakarehistro sa ngalan sa nasangpit nga inahan.
Giangkon usab niini nga ang iyang duha ka mga anak maoy utok sa pagpangatake sa Marawi. Kahinumduman niadtong Mayo 23, 2017, giatake sa mga Maute group ang Marawi City nga milungtad og lima ka buwan ug miresulta sa kamatayon sa pila ka libo ka mga indibidwal.
