BUTUAN CITY – Hilabihan ang pagpasalamat sa usa ka inahan sa Bombo Radyo Butuan human hingpit nga nakauli na sa Pilipinas ang iyang anak nga gimaltrato sa Riyadh, Saudi Arabia tungod sa tabang ning sibyahan.
Sumala pa ni Gemma Casquejo, taga-Brgy. Alubihid, lungsod sa Buenavista, Agusan del Norte nga taga Butuan City, kung dili pa tungod sa tabang sa Bombo Radyo posibling dili pa ma- CT Scan og ma-medical ang iyang anak nga si Jane Rose Dotollo og dili pa makauli sa nasud.
Sa dihang nagpatabang siya sa Bombo radyo Butuan, daw nagdali-dali sa paghimu ug lakang ang embahada sa Pilipinas lakip na ang agency sa iyang anak nga maoy nagpamasahe niini padulong sa Pilipinas.
Apan padayon gihapon ang ilang pagpangayu ug tabang tungod kay wala man siya’y dala bisan usa, sa dihang nakaabot sa Overseas Workers Welfare Administration kon OWWA sa Manila.
Kini tungod kay wala man siya nahatagan ug suweldo sa dihang nibalik siya sa iyang amo aron magkuha sa passport.
Gane, gisulayan pa kini sa pagpa-kidnapped, hinungdang gidugangan ang iyang bantay nga miabot na sa 3.
Mahinumdumang sulod sa duha ka buwang pagtrabaho sa iyang anak sa mga among Arabo niini, wala pa kini makadawat sa iyang sweldo tungod kay kulatahon man kini sa iyang among babaye og anak niini higayong pangayuon niini ang iyang sweldo.
Naluwas lang siya sa usa ka Arabong nakakita kaniya sa iyang pagsibat kondiin pulos bun-og ang iyang lawas og nagkadugo pa hinungdan nga gidala gilayon kini ngadto sa embahada sa Pilipinas.
