BUTUAN CITY – Kampante si Nanette Castillo, inahan sa usa sa mga umanong biktima sa extrajudicial killings (EJK), nga manubag si kanhe Pangulong Rodrigo Roa Duterte sa giatubang niining kasong crimes against humanity.
Sa nahimong pakig-hinabi sa Bombo Radyo, gipahayag ni Castillo ang dakong paglaum sa ilang pamilya nga kumpirmahon sa ICC Pre-Trial Chamber ang kaso ni Duterte aron hingpit kining mahulog sa usa ka full trial ug mapanubag ang kanhe pangulo.
Hugot usab nga gitubag ni Castillo ang mga nahimong pamahayag sa defense lawyer ni Duterte nga si Atty. Nicholas Kaufmann.
Sumala sa inahan sa biktima, puro binuang ang gisulti sa abogado.
Dugang pa ni Castillo, daw nahimong usa ka DDS ang langyaw nga abogado nga buta sa kamatooran tungod sa pugsanong pagpagawas nga usa ka bayani si Duterte.
Mahinumdumang gipatay ang anak niining si Aldrin sa mga wala pa nailhang suspetsado niadtong Oktubre 3, 2017 sa siyudad sa Maynila.
Ang nasangpit nga insidente natala taliwa sa dugoong war on drugs sa nakalabay nga administrasyon.
Dungan sa paglambo sa imbestigasyon sa ICC, mihangyu usab og pag-ampo ang pamilya Castillo gikan sa publiko alang sa pagkab-ot sa hustisya.
