BUTUAN CITY – Pormal nang gipa-ilalom sa hospital arrest ang usa ka ginang nga gitudlong milabay sa iyang bag-ong nahimugsong anak didto sa kasagbutang bahin sa minteryo sa Brgy. Poblacion, Bayugan City, Agusan del Sur kondiin nakit-an kining gisulod og sako nga wala na’y kinabuhi ug bali ang li-og.
Kini human na-serve sa mga prosecutors didto sa Democrito O Plaza Memorial Hospital, sa Brgy. Patin-ay, lungsod sa Prosperidad, ang warrant of arrest batuk sa 38-anyos nga ginang nga gitago lang sa pangalang ‘Milagros’, kinsa na-ospital tungod sa gihambin niini nga balatian.
Base sa impormasyon, nag-atubang ang suspesadong inahan og kasong infanticide kondiin lakip sa mihimo og inquest investigation ang mga imbestigador sa City Prosecutor’s Office.
Madumdumang anaa na sa kustodiya sa PNP Bayugan City ang lalaki nga mao matud pay nagdala sa sako nga gisudlan sa bata human kini na-ilhan sa nakasaksi sa ilang paglabay sa sako.
Nasayrang kasado matud pa ang babaye ug grabe ang kasuko sa iyang bana dihang nasayran ang iyang sitwasyon gumikan kay sa siyam ka tuig na matud pa silang wala’y sexual contact.
