BUTUAN CITY – Padayon karun ang imbestigasyon sa kapulisan aron mailhan ug masikop ang mga suspetsadong riding-in-tandem nga mipusil patay sa usa ka inahan samtang samaran ang anak niini kagahapon sa alas 10:00 sa buntag sa may Sitio Paradise, Barangay Salvacion lungsod sa Trento, Agusan Del Sur.
Sa pakighinabi sa Bombo Radyo Butuan Kang P/ Sr. Insp. Jerry Fernandez sa Trento Municipal Police Station, giila niini ang biktima nga si Kimberly Catalino, nga taga Sitio Kugunan, Barangay Poblacion sa maong dapit.
Sumala pa sa Hepe nga gikan namalengke ang biktima kauban sa iyang 8-anyos nga bata og sa ilang pagpamauli sakay sa usaka Habal-Habal, gisundan kini sa naka-single motor nga mga suspetsado nga naka-bonnet.
Pag-abot sa dapit nga nahitaboan, gipaulanan sa bala ang mga biktima diin upat ka igo sa likod ang bahin ang nahiaguman sa inahan hinungdan sa iyang hinanaling kamatayon samtang ang nadamay nga anak, na-igo sa tuong kamot.
Daling gidala ang bata sa balay-tambalanan sa lungsod sa Bunawan, Agusan Del Sur samtang ang mga suspetsado daling misibat ngadto padulong sa Bislig City.
Sa pagpanubay sa kapulisan, gitoohang away sa yuta ang motibo sa pagpamusil human nasuta nga dunay inilogay sa yuta sa lugar sa biktima.
