BUTUAN CITY – Padayon pa ang imbestigasyon sa kapulisan sa lungsod sa Nasipit, Agusan del Norte sa natigayong pagpamusil kagabii sa usa ka ginang nga miresulta sa iyang hinanaling kamatayon.
Gi-ila ni Nasipit Municipal Police Chief Captain Franklin Lacana ang 44-anyos nga biktimang si Anita Salinsing, residente sa Sitio Macasihi, Brgy, Camagong sa maong lungsod.
Sa eksklusibong pakighinabi sa Bombo Radyo Butuan, gipadayag ni PCaptain Lacana nga pasado alas-nueve na kagabii dihang gisulod sa wala mailang armadong lalaki ang tindahan sa biktima dayong pusil sa iyang ulo ug lawas resulta sa iyang hinanaling kamatayon.
Sigon sa mga nakakita, daling misibat padulong sa bukid nga bahin ang suspek human sa insidente.
Dugang ni Captain Lacana, ubay-ubay na nga anggulo karon ang ilang gitutukan ug apil niini ang gibutyag sa bana sa biktima nga duna kini mga naka-away nilang silingan.
Apil usab niini ang posibleng atraso niya sa walhong grupo ilabina nga baga-baga pa og mga supporters ang rebeldeng New People’s Army kon NPA sa maong lugar. Hangtud sa pagkutlo niini nga balita, pabilin pang at large ang suspek.
