BUTUAN CITY – Nag-file og impeachment complaint kaganina ang Duterte Youth Party-list ngadto sa buhatan sa secretary general sa House of Representatives batuk kang Pangulong Ferdinand ‘Bongbong’ Marcos Jr. tungod sa pagtugot niini nga dakpon si kanhi Pangulong Rodrigo Duterte ug gitugyan pa ngadto sa International Criminal Court (ICC).
Mismong sila Ronald Cardema ug Marie Cardema sa Calamba City, Laguna, kinsa mga lider sa nasangpit nga party-list, maoy nagduso sa impeachment complaint.
Giduso sa Duterte Youth Party-list ang reklamo karong anaa na sa hinapos ang 19th Congress; tungod sa mid-term elections nga matigayon upat ka adlaw gikan karon.
Sa Facebook post sa mga party-list leaders, ialng gibutyag nga base sa Rules of Procedure sa Impeachment Proceedings, Rule 2 Section 3, ang beripikadong reklamo alang sa impeachment nga himuon sa usa ka membro sa House o ni bisan kinsa pinaagi sa resolution of endorsement, kinahanglang i-file sa buhatan sa Secretary-General ug i-refer gilayon ngadto sa House Speaker.
Dugang pa sa post, as of alas-3:20 sa hapon, gibutyag sa mga staff members sa buhatan sa SecGen, nga kini lang ang mudawat sa reklamo apan wala kini sa maong buhatan rason nga wala pa kini hingpit nga maduso.
Ang Duterte Youth Party-list ka-alyado ni Vice President sara Duterte, ang anak ni kanhi Pangulong Rodrigo Duterte.
