BUTUAN CITY- Pormalidad lang matud pa ang nagpadayon nga deliberasyon sa House Committee on Justice kalabot sa impeachment complaint batok kang President Ferdinand Marcos Jr.
Sumala ni Jeffrey “Ka Eric” Celiz, Secretary General sa Bangon sambayanan, nga pormalidad lamang kini ug dili tuyo nga mapa-impeach ang Presidente, gani ang unang complaint nga gihisgutan ni Congressman Egay Erice, konektado sa Marcos-Araneta diin gilaraw aron masabutahe ang mas seryoso nga kaso nga adunay ebidensya ug testigos lakip na si Zaldy Co ug ang grupo nila Congressman Jacinto “Jing” Paras, Congressman Mike Defensor ug kanhi Governor Chavit Singson, inay wala nakalusot tungod sa teknikalidad.
Sigon pa ni Celiz, nga ang ikaduhang complaint usab nga konektado sa Communist Party of the Philippines-New People’s Army-National Democratic Front kon CPP-NPA-NDF nga mga partylist, giingon nga kaalyado sa linya ni kanhi House Speaker Martin Romualdez, mipakita lang matud pa og formalidad.
Gipunting ni Celiz, nga ang tinuod nga tumong mao ang impeachment batok kang Vice President Sara Duterte, ug ang kaso batok kang Marcos usa lamang ka gimik aron ipakita nga patas ang deliberasyon ug aron dili makita nga selektibo ang proseso. Matud pa niini, ang impeachment usa ka “numbers game” ug dili mahitabo ang pagtangtang kang Marcos. Gani ang tinuod nga target mao ang pag-pasaka sa Senado sa kaso batok kang Duterte, diin mas dako ang posibilidad nga kini mahatagan og paborableng aksyon.
Gibutyag pa ni Celiz nga ang tanang ginahimo karon sa Kongreso usa ka cover-up aron ipakita nga patas ug balance ang proseso, nga daw gi-impeach si Marcos ug gi-impeach usab si Duterte, apan sa tinuod ang sentro sa operasyon mao ang pagpadayon sa kaso batok sa Bise Presidente.
Dugang pa ni Jeffrey Celiz, nga sa mahimong botohan karung adlawa Miyerkules Pebrero 4 kalabot sa impeachment complaint batok kang President Ferdinand Marcos Jr., gilauman nga mosangpot ang kadaghanan nga insufficient in substance ug mahimong madismiss gikan sa Order of Business. Gipasabot usab niini, nga kulang sa attachments ug ebidensya ang maong complaint kansa tinuyo aron mapakyas. Bisan pa og ipasaka sa plenaryo, pag-abot sa binotohay, gibutyag ni Celiz nga mapildi gihapon kini tungod kay ang impeachment usa ka “numbers game” ug kontrolado gihapon sa grupo nila kanhi Speaker Martin Romualdez ug President Marcos Jr. ang kapin 200 ka mga kongresista, inay dili mahitabo nga mahatod sa Senado ang kaso batok sa Presidente.
