BUTUAN CITY –Gisumite na ni Senadora Imee Marcos sa Office of the Ombudsman ang chairman’s report sa Senate Committee on Foreign Relations may kalabotan sa pagdakop kang kanhi Pangulong Rodrigo Duterte sa The Hague tungod sa kasong crime against humanity nga may kalambigitan sa iyang kampanya kontra iligal nga droga.
Sa iyang sulat kang Ombudsman Samuel Martires, gipadayag ni Marcos nga sa pagdungog sa komite, mitungha ang posibilidad nga may legal nga katungdanan ang pipila ka taas nga opisyal sa gobyerno, busa iyang gihangyo nga imbestigahan ang ilang mga lihok.
Apil sa gustong ipa-imbestiga mao sila Justice Secretary Boying Remulla, Interior Secretary Jonvic Remulla, Philippine National Police Chief Gen. Rommel Marbil, CIDG Chief Gen. Nicolas Torre III, ug Special Envoy Markus Lacanilao.
Nagtuo siya nga patas ug walay pabor-pabor ang Ombudsman ug naglaum nga kasuhan ang mga opisyal nga mapamatud-ang nakalapas sa balaod.
Mahinumduman nga si Duterte gidakop niadtong Marso 11 aron tubagon ang kaso sa International Criminal Court.
