BUTUAN CITY – Gipalawman pa ang imbestigasyon sa pagpamusil nga natigayon sa Purok-7, Barangay Holy Redeemer ning atong siyudad sa Butuan bandang alas 11:00 sa miaging gabii.
Sa maong panghitabo napatay ang biktimang si Potcholo Piedra, 34-anyos, dunay kapuyo nga residente sa Purok-2 sa maong barangay samtang nadamay usab ang estudyanteng babaye nga si Ivy nga lumulopyo sa maong dapit human naigo sa walang batiis.
Sa inisyal nga imbestigasyon, nag-inom ang biktima ug mga kaubanan daplin sa kalsada sa dihang dunay mihunong nga single motor nga XRM og dayung pusil sa makadaghan higayon. Daghang mga samad pinusilan ang na-angkon sa biktima nga resulta sa hinanaling kamatayon.
Sigon ni Police Capt. Anne Cubio, tigpamaba sa Butuan City Police Office nga dunay testigo sa panghitabo diin nailhan niini ang usa sa mga suspek tungod kay iya kining kanhe kapuyo. Sumala sa saksi nga selos ang posibleng motibo sa kremin.
Apan mihangyu ang kapulisan nga dili una ibulgar ang ngalan sa suspek nga daling misibat human sa panghitabo. Sa gihimong proseso usab sa SOCO, nakuha sa crime scene ang pito sa basyu sa bala sa wala pa mailhang kalibre sa armas samtang nakuha usab gikan sa biktima ang sachet sa gitoohang shabu nga mitimbang og 5 gramos. (REPORTS FROM: Bombo Rolan Janea)
