BUTUAN CITY – Dako matud pa ug tabang alang ngadto sa mga botante nga mubotar sa umalabot nga barangay ug sk election ang bag-uhay lang gipagawas nga narcolist sa buhatan sa Philippine Drug Enforcement Agency ( PDEA ) sa mga barangay officials nga nalambigit sa ilegal nga druga sa nasud.
Sa pakighinabi ning sibyahan, gibutyag ni Cong. Robert ‘Ace’ Barbers sa 2nd district sa Surigao del Norte, nga pinaagi sa maong narcolist, mahatagan sa insaktong mga kasayuran ang mga botante kung kinsa kadtong mga kandidato sa ilang lugar nga nalambigit sa ilegal nga binuhatan.
Sigon niini nga mamahimong makasayod sila kung kinsa gyud kadtong angayang suportahan ug botaran sa umalabot nga piniliay.
Gidugang pa niini, nga partial pa lamang ang unang listahan nga gipagawas sa PDEA tungod kay aduna pa usab listahan kangsa ang mga nalakip nga pangalan ang gipailawom pa karon sa validation.
Sa nasangpit matud pa nga listahan, daghan matud pa niini ang taga- Caraga Region.
Gipasabot usab niini nga dili na angayang kuwestiyonon pa ang nasangpit nga narcolist tungod kay miagi matud pa ug insaktong validation gikan sa 4 ka mga intelligence community sa nasud ang maong listahan nga maoy nagseguro nga tinuod gyud nga nalambigit sa ilegal nga drugas ang mga nalakip nga pangalan.
Subay niini, giawhag na lamang niini ang publiko nga susihon gyud ug maayo ang mga kandidato nga magpapili sa umalabot nga piniliay pinaagi sa pagsubay sa ilang track record ingon man kakapas sa pagdumala sa barangay. (Mon Aplaya)
