BUTUAN CITY – Nag-atubang og patong-patong nga mga kaso ang usa ka public school teacher uban sa laing lima ka mga indibidwal human ang malampusong operasyon sa ginadiling druga nga gihimo sa usa ka suspected drug den ning mi-aging adlaw sa Brgy. Taft, Surigao City.
Gi-ila ni Philippine Drug Enforcement Agency kon PDEA-Caraga spokesperson Dindo Abellanosa ang drug suspect nga si Paulo Sulapas Alfante, 36-anyos, usa ka high school teacher sa Anomar National High School sa Barangay Anomar, Surigao City.
Samtang naila ang laing lima nga sila Leonel Eder, 32-anyos, Alan Caday, 33-anyos, Jufre Comandante, 34-anyos, Carl Lloyd Apillanes, 18-anyos og usa ka minor de edad.
Mga kasong pagpamaligya og ginadiling druga, pagmintina og usa ka drug den, paghupot og ginadiling druga, apparatus og ubang mga paraphernalia ang atubangon sa mga suspetsado.
Gibutyag ni Abellanosa nga usa si Alfante sa unom ka mga gidudahang drug personalities nga gi-aresto sa mga anti-drug operatives nga misulod sa usa ka suspected drug den sa Barangay Taft, Surigao City ning mi-aging adlaw.
Nakumpiska sa mga otoridad ang 13 ka plastic sachets sa shabu nga gibana-banang mikantidad og 125-mil pesos og mga drug paraphernalia. (Beth Ruiz)
