BUTUAN CITY – Gikumpirma sa Ukraine nga ilang naguba ang ikaduhang strategic bridge sa Russia sa duha ka semana na nilang nagpadayong incursion ngadto sa Kursk region.
Nagpagawas ang Ukrainian military og aerial footage sa strike sa maong tulay ibabaw sa Seym River sa Zvannoe.
Paglabay sa pila ka oras, gipadayag ni Ukrainian President Volodymyr Zelensky nga tumong sa ilang military incursion ngadto sa Kursk, naglakip sa pagmugna og usa ka “buffer zone” aron mahunong na ang pagpangatake sa Russia.
Halos anaa na sa duha ka semana sa ilang pinakadakong pag-atake ang Ukraine ngadto sa teritoryo sa Russia sukad gilusad sa Moscow ang ilang pagsakop sa Ukraine niadtong tuig 2022.
Sa social media post ni Ukrainian Air Force commander Lt Gen Mykola Oleschuk, gibutyg niining nagpadayon ang Ukrainian Air Force aviation pagputol sa logistical capabilities sa Russia pinaagi sa tukma nga airstrikes, nga klarong naka-apekto sa dagan sa hostilities.
