BUTUAN CITY – Tungod sa dili na makayang problema sa kasing-kasing human gibuwagan sa iyang hinigugma nagdesisyon na lang ang usa ka 19-anyos nga ulitawo didto sa iyang gitabahuan sa Purok 1-A, Brgy. 5, San Francisco, Agusan del Sur nga tapuson na lang ang iyang kinabuhi.
Gi-ila ni Police Senior Master Sergeant kon PSMS Thor Laureto ang biktimang si Jupeth Pasoc, residente sa Purok 6-A, Brgy. Tagbuyagan, Rosario sa maong lalawigan ug usa ka construction worker.
Sa eksklusibong pakighinabi sa Bombo Radyo Butuan, migawas sa ilang imbestigasyon nga pila ka adlaw nang namatikdan sa iyang igsoong si Frederick Pasoc nga kanunay na kining maghinuktok sukad gibuwagan sa iyang hinigugma ug kanunay na matud pang nagbahad nga maghikog.
Pasado alas-3:30 na sa kaadlawon dihang namatikdan ni Frederick ang iyang igsoon sa unahan gikan sa ilang gipuy-ang bunk house hangtud nga nakumpirma niyang naghikog gyod kini ug wala na’y kinabuhi.
Mahinumdumang ning mi-aging adlaw lang dihang napalgang patay na usab sila Ramon Cortez, 30-anyos human naghikot sulod sa ilang bahay sa Purok 5, Brgy. Cecilia, San Luis sa mao usab nga lalawigan ug ang 21-anyos nga college student nga si Salazar Añasco sa Brgy. Dagohoy ning siyudad sa Butuan.
Ang tulo parehong naghikog tungod sa problema sa gugma.
