BUTUAN CITY – Dili mu-ubos sa walo ka mga tawo ang patay samtang laing 20 ang angol sa pagbusikad nga natigayon duol sa Red Fort, usa sa pinakabisitahan nga historic sites sa Delhi, India.
Natigayon kini sa gawas nga bahin sa usa ka metro station hinungdan sa kadaghan sa mga sakyanang nangadamyos. Sigon sa mga pulis, ang sakyanan nga Hyundai i20, diin nagikan ang mga eksplosibo ug duna’y kargang tulo ka mga pasahero, mihunong sa red light dayon mibusikad.
Wala pa masuta ang hinungdan sa apgbusikad ug kini karon ang gisuta sa mga imbestigador aron masayran kung diin gikan ang nasangpit nga sakyanan ug kinsa ang tag-iya niini.
Pipila na ka mga lugar ang gibutang karon sa high security alert tungod sa maong hitabo, apil na ang mga historic monuments ug mga airports.
