BUTUAN CITY – Na-recover sa kapulisan sa national highway sa Brgy. Amontay, lungsod sa Marihatag, Surigao Sur kagahapon sa alas-tres sa hapon ang usa ka improvised explosive devise kon IED nga mitimbang og 7-kilos, duna’y walo ka pulgadang gilapdon og 12-pulgadas ang gitas–on.
Sigon ni P/Sr. Supt Francisco Dungo, Jr., malampuson nga pagkuha sa maong IED human kini gisumbong sa mga kanhi rebelde kinsa gusto nang magpuyo nga malinawon.
Nasayrang nga niadto pang Martes gisugdan ang paguba sa semento sa kalsada aron lang makuha ang maong IED samtang duna pa’y duha nga padayon pa nilang gipangita sa susamang lugar.
Gika-ingong ang maong IED nga gibutang sa kalsada kayang mubungkag bisan sa pinakadakong sakyanan.
Gitu-uhang ang pagtanum sa maong IED gihimo dihang gisemento sa taga-Department of Public Works and Highways kon DPWH ang maong kalsada niadto pang tuig 2010 kansa nakahatag og kadelikado tungod sa posibilidad nga muboto kini higayong maigo sa kilat. (Beth Ruiz)
