BUTUAN CITY – Nagpahinumdum ang International Committee of the Red Cross kon ICRC sa pagpatunhay sa international humanitarian law ilabina sa nagpadayun nga giyera sa Marawi City.
Sa pagpasabot ni Lany Dela Cruz sa ICRC nga gidestino sa Iligan City, kinahanglan matud pang respetuhon ang kinabuhi, lakip na niini ang dili pagdamay sa mga sibilyan sa nagpadayun nga giyera, pag-atiman sa mga samarang mangugubat ug mga dinakpan, ma-panig sa gobyerno man kini ug sa kalaban.
Dugang pa ni Dela Cruz, ipatuman ang nasangpit nga prinsipyo aron sa ingon maminusan ang kasakit sa katawhan.
Nasayrang sa pagdagsa sa mga bakwit tungod sa kagubot sa Marawi City, padayung nag-apod-apod ang ICRC ug emergency relief food packs, nga kayang magsuplay sa 5 ka tawo sulod sa duha ka semana.
Naghatag usab sila ug mga hygiene items ug essential household items samtang muabot usab sa 11 ka ospital ug rural health units ang natunulan nila ug medical supply ilabina kay misaka na ang kaso sa mga nagkasakit diha sa evacuation centers.
Sa kasamtangan, dili pa gihapon masulod ang gitawag nga ground zero sa siyudad tungod sa padayung giyera hinungdang kutob lang sila sa provincial capitol.
Gibutyag usab niini nga duna pay sobra sa 300 ka sibilyan ang na-trap sa dakbayan. (Rolan Janea)
