BUTUAN CITY – Mihimo og opisyal nga pagbisita ang mga personahe gikan sa International Committee of the Red Cross kon ICRC, usa ka neutral humanitarian organization nga nagprotekta ug nag-asister sa katawhang apektado sa armadong gubat ngadto kang Police Regional Office kon PRO-13 director Brigadier General Joselito T. Esquivel, Jr.
Sa nakalabay nga adlaw. Isip kabahin sa pagbisita, gihisgutan sa PNP og ICRC ang medical evacuation nga gihimosa ICRC sa duha ka indibidwal nga dunay samad pinusilan gikan sa Surigao del Sur ngadto sa Davao Regional Medical Center niadtong Mayo 29, 2020, nga gihimo pinaagi sa suporta sa Philippine Red Cross, ang ilang primary partner sa nasud.
Gipaklaro sa ICRC nga ang gihimong pag-evacuate, usa lang ka trabaho sa organisasyon isip mandatu ilalom sa International Humanitarian Law kon IHL, aron sa pag-asister sa pagkuha og pagtabang sa mga tawong nasamdan sa bisan unsang giyera nga nag-kinahanglan og medikal nga pag-atiman.
Gipamugos sa ICRC ngadto sa PNP nga kabahin sa ilang prinsipyo nga walay dapigan sa bisan unsang armadong kagubot og ang ilang tumong nga matabangan ang kadtong mas nanginahanglan nga walay bisan unsang diskriminasyon.
Sa kabahinan ni Regional Director Esquivel, Jr, gipahayag niini nga ang puwersa sa kapulisan, usa sa aktibong partner sa Philippine Red Cross sa ilang adbokasiya sama sa bloodletting dayung saad nga magpadayon ang nasangpit nga partnership ilabina kung ang tumong mao ang pagluwas og pagprotekta sa katawhan.
Ang PNP Caraga og ICRC mipasalig nga e-promotar ang tawhanong katungod ug respeto sa International Humanitarian Law isip pundasyon sa patas og malahutayong kalinaw.
