BUTUAN CITY – Gikumpirma ni Independent Commission for Infrastructure kon ICI chairman Andres Reyes nga i-livestream na sugod sunod semana ang ilang mga pagdungog.
Gipahibalo kini ni Reyes atol sa pagdungog sa Senado human nga ila na mmatud pang nakab-ot ang teknikal nga kapasidad sa ilang mga imbestigasyon kalabot sa bilyunes pisos nga korapsyon sa mga flood control projects.
Bisan pa man nga wala pa sila’y kumpletong pasilidad ug pamaagi sa proseso, makapaminaw ug makakita na ang publiko sa ilang himuong mga pagdungog.
Sumala ni Senador Kiko Pangilinan, usa kini ka maayong balita aron mahibal-an sa publiko ang kalamboan sa gihimong imbestigasyon sa ICI.
Bukás usab si Makati Business Club Executive Director Rafael Ongpin sa pag-livestream sa tanang sesyon sa ICI, apan gipasabot niyang kinahanglan gihapon nga hatagan og katungod ang komisyon sa pagdeklara og confidential sessions kung gikinahanglan.
Matod ni Ongpin, importante ang transparency sa imbestigasyon, apan kinahanglan usab nga likayan nga mahimong “circus” o palabas ang mga pagdungog nga posibeng muresulta sa public shaming sa mga gi-akusahan.
Gipasabot usab ni Ongpin nga ang kagahom sa ICI kinahanglang palapdan, sama sa gisugyot ni Senate President Vicente Sotto III ilabina nga kinahanglang aduna kini judicial, investigative, ug confiscatory powers, sama sa Presidential Commission on Good Government (PCGG) kaniadto.
Lakip niini ang power of subpoena, pagdeklara og contempt, lakip ang pag-aresto o pag-isyu og hold orders human sa due process, ug ang katungod sa direktang pagpasaka og kaso nga dili na kinahanglan mu-agi pa sa Ombudsman, Department of Justice, o Office of the Attorney General.
Dugang pa ni Ongpin, kinahanglan usab nga palapdan ang sakop ug ihap sa mga miyembro sa komisyon aron matubag ang daghang kaso kalabot sa anomalya.
