BUTUAN CITY – Dawat na sa pamilya Duterte ang desisyon sa Appeals Chamber sa International Criminal Court (ICC) nga wala motugot sa hangyo nga interim release o temporaryong kagawasan kang kanhi Pangulong Rodrigo Duterte.
Kini human gibasura sa 5 ka panel judges sa International Criminal Court (ICC) Appeals Chamber pinaagi sa unanimous decision, ang hangyo kagabii, Biyernes, Nobyembre 28.
Gibasa ni ICC Appeals Chamber Presiding Judge Luz del Carmen Ibáñez Carranza ang maong desisyon. Gipalig-on sa Appeals Chamber ang desisyon sa Pre-Trial Chamber I nga una nang mibasura sa apela sa kanhi Pangulo alang sa interim release, diin nakita nga gikinahanglan ang padayon nga pagpabilin sa pagkapreso sa kanhi presidente sa Pilipinas.
Apan gi-apela kini sa kampo sa kanhi Pangulo ug ilang gipasangil nga napakyas matud ang Pre-Trial Chamber I sa pagtan-aw nga adunay flight risk o peligro nga molayas ang kanhi Pangulo aron malikayan ang pag-atubang niini sa mga kaso nga crimes against humanity batok kaniya.
Bisan pa man, magpadayon sila sa pakigtambayayong sa defense team sa kanhi Pangulo alang sa iyang kaso ug adlaw-adlaw nga pakig-istorya kaniya.
Nagpasalamat ang pamilya Duterte sa tanan nga nag-uban kanila sa pag-ampo.
Usa sa mga nasubo niini si Senador Robin Padilla kinsa migawas pa sa ilang sesyon aron lang atangan ang maong desisyon nga nakapaluya kaniya.
Samtang girespeto sa Malacanang ang resulta sa maong desisyon kung diin sumala ni Palace Press Secretary Claire Castro nga nakahimo na og desisyon ang ICC ug pasagdan na lang kini ug irespeto.
