BUTUAN CITY – Gibasura sa Korte Suprema ang mosyon nila Senador Ronald ‘Bato’ dela Rosa ug kanhi Pangulong Rodrigo Duterte
nga naghangyo og Temporary Restraining Order (TRO) batok sa arrest warrant nga gi-isyu sa International Criminal Court (ICC).
Kini human gibutyag ni Ombudsman Boying Remulla nga kumpirmadong aduna’y warrant batok kang Dela Rosa, kondiin ang Department of Justice (DOJ) ang may katungod sa pag-atiman sa maong isyu.
Niadtong Nobyembre 13, ang kampo nila Senador Ronald “Bato” Dela Rosa ug kanhi Pangulong Rodrigo Duterte nagduso og Very Urgent Manifestation sa Korte Suprema, nga naghangyo og TRO aron pugngan ang implementasyon sa arrest warrant sa ICC.
Ang ilang mosyon gitumong batok sa mga hingtungdang opisyal sa gobyerno, nga gi-akusahang padayon nga nakig-alayon sa ICC bisan pa sa pag-withdraw sa Pilipinas sa Rome Statute niadtong 2019.
Gibasura sa Korte Suprema ang maong mosyon, nga nagpasabot nga wala kini gi-entertain isip legal nga paagi aron mapugngan ang ICC warrant.
Ang desisyon nagpasabot nga wala nay legal nga babag gikan sa Korte Suprema batok sa posibleng implementasyon sa ICC arrest warrant batuk kang Dela Rosa.
Sa gipahigayong En Banc Session sa Korte Suprema, wala nila gipaburan ang hangyo sa mga petitioners nga manduan si Ombudsman Jesus Crispin ‘Boying’ Remulla nga isubmite ang kopya sa warrant.
