BUTUAN CITY – Gikatakdang ipailawom sa drug test ang Australian national nga naaresto sa kasong pagkupot ug illegal nga droga.
Sa eksklusibong pakighinabi sa Bombo Radyo Butuan, gibutyag ni Dindo Abellanosa – regional spokesperson sa Philippine Drug Enforcement Agency kon PDEA Caraga nga arestado ning nakalabay’ng alas 10:55 sa gabii si Michal ‘Mickey’ Audziejczyk, 41 anyos sa may Sunset Bay Villas sa Barangay Catangnan, General Luna, Siargao Island, Surigao del Norte atol sa pagpatuman ug search warrant nga gi-isyu ni Judge Cesar Bordalba.
Nakumpiska gikan kaniya ang 30 ka pakete sa ugang dahon sa marijuana nga dunay gibug-atong 30 gramos ug nagkatidad ug 30 mil pesos. 10 ka buhing bala sulod sa itom nga sling bag, 2 ka unit sa keypad cellular phone, Australian passport ug usa ka ampule Sustanon 1ml/30mg.
Gidugang sa opisyal nga halos usa ka srmana nilang gipa-ilawom sa surveillance ang suspek nga usa ka High Value target kinsa gawas sa kasong paglapas sa Sec. 11, Article II sa RA 9165 posibleng usab nga mag atubang ug kasong paglapas sa RA 10591 kon Comprehensive Firearms and Ammunition Regulation Act.
Kasamtangang gikostudiya sa PDEA ang suspek samtang kasuhan pinaagi sa inquest proceedings karong adlawa.
