BUTUAN CITY – Gidayeg sa Commission on Human Rights kon CHR ang talagsa-ong ka-isog nga gipakita ni Judge Jocelyn Solis-Reyes sa pagkupot sa kaso sa Maguindanao massacre taliwa nga impluwensyado og gamhanang kaliwatan ang mga akusado niini.
Sa eksklusibong pakighinabi sa Bombo Radyo, gipadayag ni Atty. Jackielyn de Guia, tigpamaba sa CHR, nga dili dali ang pagkupot sa maong kaso ilabina nga nabutang sa peligro ang iyang kinabuhi ug pila ka higayon usab nga gisulayan siya pagtangtang pagkupot sa maong kaso ilabina nga daghan na nga mga huwis ang mi-atras sa pagkupot niini.
Wala pa’y labot niini ang langay nga pagpagawas sa hukom tungod sa kadaghan sa mga akusado ingon man sa tun-an nga mga papeles ug sa testimoniyang gitimbang-timbang niya human napaminawan sulod sa korte.
Samtang gipasabot ni Atty. De Guia nga lahi-lahi ang pagtratar sa husgado sa mga akusado depende sa ilang partisipasyon sa kremin sama niadtong gisugo lang kon mga accessories, panagkunsabo apil na ang nagsugo sa paghimo niini ug ang nagplano.
Ang uban matud pa nga na-abswelto, resulta sa konsiderasyon sa kabanay sa mga biktima kinsa nakasabot nga wala sila’y laing choice kondili ang himuon ang kremin tungod usab sa bahad sa ilang kinabuhi ug sa ilang pamilya.
Gidugang sa abogada nga makabilib ang ka-isog nga gipakita ni Judge Solis-Reyes ug pagbarog sa angayang buhaton taliwa sa daghang nga pagsulay nga iyang naagi-an.
