BUTUAN CITY – Hustisya ang singit sa pamilya Jumawan alang kang Danilo Jumawan, ang kanhi nang nabalita nga gipusil-patay sa mga kapulisan sa Bayugan City tungod sa pag wild niini.
Apan pag tin-aw sa Pamilyang Jumawan, puros matud pa bakak ang nasangpit nga impormasyon ug wala matud pa kini kamatuoran. Sumala ni Juvelyn Jumawan, igsoon sa nasangpit nga biktima nga nagsugod matud pa ang pag bahasbahas sa biktma sa kadalanan sa Purok 3, Libre St., Brgy. Taglatawan, bitibit ang sundang niini human siya gipasanginlan nga siya matud pa ang suspek sa tulis nga nahitabo niadtung tungora.
Saysay sa igsoon sa biktima nga imposible matud pa nga manulis ang iyahang magulang sanglit wala may rason nga mangita pa kini og kwarta sa dautang paagi tungod kay daghan man matud pay kayutaan ang biktima.
Naka angkon ang biktima og lima ka mga samad-pinusilan. Gawas niini, duna pa usay nadamay nga sibilyan sa maong pagpamusil. Disidido ang maong pamilya nga mopasaka og kaso ngadto sa tanang nalambigit sa kamatayon kang Danilo, ug wala usab matud pa nagpakita kanila ang mga pulis nga naka pusil sa maong biktima.
Dugang niini dili matud pa takdo ang pasangil nga ang biktima ug ang suod niini nga higala ang nanulis sa usa ka magtutudlo sa may Taglatawan bandang alas 9 sa buntag, kansa nakuhaan usab og 8 mil 500 pesos nga kwarta sanglit sa susamang mga oras matud pa, anaa ra si Danilo sa ilahang compound, nagligo-ligo sa iyahang iro.
