BUTUAN CITY – Hustisya ang singgit karon sa inahang si Novy Marie Mabras, residente sa Brgy. Bonbon, lungsod sa San Francisco, Agusan del Sur human siya gipahibalo sa Democrito O. Plaza Memorial Hospital nga patay na ang usa sa kaluhang gi-incubate human nahimugso nga premature niadtong Disyembre 15, 2024.
Kini taliwa nga ila na unta kining ipagawas sa maong ospital kagahapon tungod kay maayo na ang kondisyon niini, pila ka semana human namatay ang kaluha niini niadtong Disyembre 30 tungod sa pagpanglagom.
Sa eksklusibong pakighinabi sa Bombo Radyo Butuan, gipadayag ni Mabras nga ang ilang gikasakit tungod sa kadaghan og mga samad-tinupukan og dagum sa nagkada-iyang parte sa lawas niini ug nagdugo pa ang dughan, braso, ilong ug tiil niini.
Sa ospital pa lang, natingala na sila nganong giputos og maayo ang bata ug gisulod sa karton kondiin gisultihan pa sila nga didto na kini ablihan sa ilang balay. Daw gikumot ang ilang kaising-kasing dihang nakita ang mga dagkong tinupukan sa dagom sa dughan ug sa lukunan sa tiil niini.
