BUTUAN CITY – Gihingusgan karon sa mga netizens ang hustisya alang kang Albert Caerlang, ang room boy sa usa ka lodging house ning siyudad sa Butuan kinsa nakapabuhagay sa ka-init sa iyang lawas human nasaypan pagkamang sa usa sa ilang mga babayeng kliyente.
Kini ang migawas sa reaction marathon nga gihimo sa Bombo Radyo Butuan human nga daghan ang nagkomento sa maong balita nga nakapakugang sa mga listeners og mga followers ning sibyahan.
Mabasa sa page sa Bombo Radyo Butuan nga mayoriya sa mga netizens nga nakabasa sa maong balita, dismayado sa pagpasaka og kasong rape sa maong babaye kinsa nasayop pagsulod sa kwartong gi-check-inan nila sa iyang hinigugma.
Mahinumdumang sa asuy ni Caerlang, nga taga-Alegria, Surigao del Norte, mipahulay siya sa bakanteng kwarto human ang 24-oras nga pag-duty dihang kalit lang misulod ang babayeng kliyente nga mipa-ulan kaniya og romansa rason nga iyang napahungaw ang iyang gibating ka-init.
Sigon sa mga netizens, ang babaye maoy angayang mabasol sa nasangpit nga hitabo ilabina nga imposible kaayong sulod sa pila ka minutong romansahay, wala siya masayod sa diskarte sa iyang uyab ibabaw sa kama.
Bisan og duna’y pipila lang nga midepensa sa babaye nga dili angayang hukman tungod kay posibleng hubog kini, siya gihapon matud pa ang angayang kasuhan og invasion to privacy og illegal entry.
