BUTUAN CITY- Nakadaog og kontrata nga nagkantidad og US$37 milyon ang UBTech Robotics aron magdeploy og humanoid robots sa mga border crossing tali sa China ug Vietnam, isip kabahin sa paningkamot sa nasud nga mas palapdan ang paggamit sa robotics sa tinuod nga operasyon.
Base sa kompanya, ang kasabutan nagkantidad og 264 milyones yuan ( ₱2 bilyon – ₱2.1 bilyon), ug gihimo uban sa usa ka humanoid robot center sa Fangchenggang, usa ka baybaying siyudad sa rehiyon sa Guangxi nga adunay utlanan sa Vietnam.
Ang proyekto maggamit sa industrial-grade humanoid robot nga Walker S2, nga gilunsad niadtong Hulyo ug giingong unang humanoid robot sa kalibutan nga makahimo sa pag-ilis sa kaugalingong baterya kung mahurot ang power.
Sa pilot project, ang mga robot ipahimutang sa border crossing aron motabang sa paggiya sa mga biyahero, pagdumala sa dagan sa mga tawo, pagbantay o patrol, ug pagdumala sa logistics ug komersyal nga serbisyo.
Gilauman usab nga gamiton kini sa pag-inspeksyon sa mga pabrika nga nagproseso og steel, copper, ug aluminum.
Sumala sa kompanya, giplano nga magsugod ang delivery sa mga humanoid robots sa Disyembre, isip unang lakang sa mas dako pang paggamit sa robotics sa industriya ug serbisyo sa nasud.
