BUTUAN CITY – Naka-abot na sa Cuba ang humanitarian aid nga gikan sa Spain isip ayuda tungod sa grabe nga krisis sa ekonomiya ug kakulang sa importanteng suplay nga ilang gi-atubang nga mugna sa gitawag nga fuel blockade sa Estados Unidos.
Uban sa tabang sa United Nations, maghatag ang Spain og pagkaon ug mga basic nga gamit pang-panglawas aron matabangan ang mga taga-Cuba nga naglisod sa kakulang sa suplay ug serbisyo.
Kini human unang nagpadala ang Mexico og kapin 800 ka toneladang humanitarian aid sa Cuba nga bag-o lang miabot.
Nasayran nga misamot ang krisis tungod sa mga pagpahugot sa administrasyon sa US nga naka-apekto sa suplay sa lana ug produktong petrolyo, apil na ang hulga sa taas nga taripa sa mga nasod nga mutabang og suplay og fuel sa Cuba.
Tungod niini, nagpatuman ang gobyerno sa Cuba og emergency measures sama sa paglimit sa pagbaligya og gasolina ug pagminus sa pampublikong transportasyon, samtang nagpadayon ang brownout ug kakulang sa pagkaon ug tambal sa nasod.
Gipadayag sa Cuban Foreign Minister ang tinguha nga palig-onon ang political, economic-trade, ug cooperation nga relasyon nila tali sa Spain.
