BUTUAN CITY – Nag-atubang sa kasong pagsupak sa Republic Act No. 10591 o Comprehensive Firearms and Ammunition Regulation Act in relation to Comelec Gun Ban ang usa ka jail guard human kini nagpabuto sa gihuptang armas sa nakalabay nga mga adlaw sa Purok 5 Barangay 12, dakbayan sa Cabadbaran, Agusan Del Norte.
Nailhan ang suspetsado nga si Kirby Racaza, 40 anyos, usa ka Jail Guard sa Agusan del Norte Provincial Jail, og residente sa nasangpit lugar. Sumala pa ni Police Major Renel Serrano, hepe sa Cabadbaran City Police Station, hubog matod pa ang suspetsado ug nanghasi sa mga silingan.
Hilabihan pa ang kahadlok nga gibati sa mga silingan human nakita nga dunay gibitbit nga pistola ang suspek nga iya pang gipabuto.
Daling miresponde ang kapulisan ug didto nasikop ang naasuy nga jail guard sulod sa mismo sa iyang pinuy-anan.
Nakuhaan kini og punto 38 revolver nga pistola ug 12 ka mga buhing bala.
Walay napakitang pertinenteng dokumento usab ang suspetsado kalabut sa iyang gihuptang armas.
