BUTUAN CITY – Dili mutuo si Pangulong Ferdinand ‘Bongbong’ Marcos Jr. sa alegasyon sa magti-ayong Pacifico ‘Curlee’ ug Sarah Discaya nga nalambigit ang iyang ig-agaw nga si House Speaker Martin Romualdez sa anomalya sa mga flood control projects.
Gibutyag sa pangulo nga daghan na ang nabiktima sa mga name-dropping ilabina kadtong mga anaa sa taas nga posisyon sa gobyerno.
Gipamugos sa pangulo nga angayang mag-igmat ang mga tawo ug dili gilayon magpagawas og mga pamahayag nga dili kayang suportahan og mga ebidensya.
Apan bisan pa man, ikonsidera matud pa niya ang pagtan-aw niini nga alegasyon aron masuta kung duna ba kini igong basehan o wala.
Gipasi-atab usab sa pangulo nga magpadayon ang imbestigasyon aron masuta ang hinungdan sa lapad nga kurapsyon karon sa nasud ug kung nganong daw nahimo matud pa kining normal karon.
Misaad usab kining bungkagon ang maong sistema sa kurapsyon.
