BUTUAN CITY – Gipadayag ni Conrado Saga, manager sa Taligaman Agrarian Beneficiaries Farmers’ Cooperative kon TAGBEFAMCO nga aprubado sa ilang kooperatiba uban sa mga membero ang pagdonar nila sa duha ka punuan sa kahoy’ng Tibo aron itabang sa subling pagpatukod sa balay sa pamilya Padrelana.
Bisan ang chainsaw nga gigamit sa pagputol sa maong kahoy nga iyang gipanag-iyahan, iya usab nga gipagamit samtang ang gigamit nga tubil niini ug pangbayad sa nagputol sa kahoy, ila usab nga gi-amot amutan. Ang una matud pang nasabutan nga usa ka punuan, nadugangan og usa pa tungod kay wala may mangsalog ug pangbongbong aron makompleto na ang tukurong balay.
Samtang sa ngalan usab sa tibuok konseho sa Brgy Holy Redeemer, dako ang pagpasalamat ni Kagawad Alfredo Ampo sa inisyatiba ni Milagros Diez kansa dakong tabang na sa ilang constituent nga si Joel Padrelana ug sa iyang pamilya aron subling makapabarog sa ilang pinuy-anan didto ra gihapon sa dapit diin sila nasunugan.
