BUTUAN CITY – Duna nay lead karung gipanubayan ang kapulisan mahitungod sa pagpamusil nga natigayon kagahapon sa alas 5:40 sa hapon sa may Purok 1, Brgy. Tolosa, Cabadbaran City.
Nasayran nga sa maong hitabo, napatay ang biktimang si Lian Balajadia, 35-anyos, olitawo nga taga Bulacan og HR Manager of South Archipelago Gravel and Sand kon SAGS.
Gipusil ang biktima sa wala mailang mga suspetsado nga riding-in-tandem sa dihang kini panaog sa sakyanan sa atubangan sa staff house sa maong dapit. Sigon ni PLt. Col. Renel Serrano, hepe sa Cabadbaran City Police Station, nakasakay sa pula nga single motor ang mga suspek nga daling misibat human gipusil sa makadaghang higayon ang biktima.
Hinoon wala na hilabti pa sa mga suspetsado ang driver sa sakyanan. Sumala sa opisyal nga away sa mga tag-iya sa kompanya ang gitutukan karun nilang lead sa imbestigasyon.
Pasabot pa ni PLlt. Col. Serrano nga sa nakalabay nga tuig dunay midool kaniya nga share holder sa company nga gustong ipahunong na ang operasyon tungod sa wala magkasinabot sa share of stocks.
Nakadawat matud pang bahad ang biktima gikan sa ubang tag-iya sa kompanya samtang duna pay insidente nga dunay nakasab-an kini nga usa diay sa mga share holder.
Pagklaro pa sa opisyal nga wala sila magtumbok nga kini na ang mihimo sa kremin apan kini lang ang gipanubayan nilang motibo sa gihimong imbestigasyon.
