BUTUAN CITY – Gihagit ni House Speaker Martin Romualdez si Vice President Sara Duterte nga ipasabot ang sayop nga paggamit sa P612.5M nga confidential funds sa Office of the Vice President ug sa Department of Education.
Sa iyang mensahe sa plenaryo kagahapong adlawa, gibirahan Romualdez si VP Sara tungod sa hulga nga nakig-estorya na siya alang sa mupatay kaniya ug nila Pangulong Bongbong Marcos ug First Lady Liza Araneta-Marcos.
Sigon ni Romualdez, alarming ang pamahayag ni VP Sara ug delikado ilabina kay dili na kini normal nga mga pulong kundi direktang hulga sa demokrasya, sa gobyerno ug sa seguridad sa nasud.
Gidepensahan usab ni Romualdez ang Kamara batuk sa mga pag-atake ug sa gika-ingong breach of protocols nga gihimo sa bise-presidente dayong panawagan sa mga ka-ubanang magbabalaod nga protektahan ang integridad sa institusyon.
Wala matud pa’y basehan ang mga alegasyon nga gipabagsak o gidaot niya si Duterte tungod sa ambisyon niining mudagan pagka-presidente sa tuig 2028 ug makonsiderang desperadong lakang aron matud pa ilikay ang tinood nga isyu.
