BUTUAN CITY-Nagpadayon pa ang gihimong Hot Pursuit operation sa mga myembro sa Philippine Drug Enforcement Agency Regional Office 9 batok sa pito ka mga piniriso, kansa naka ikyas gikan sa PDEA facility.
Sumala sa impormasyon nga nakalap ning sibyahan, nasakpan nalang sa mga prison guards ang maong prison break bandang alas 2:45 ang takna sa kadlawon karong adlawa, Mayo 13. Sa gihimong imbestigasyon sa mga otoridad, nasayran nga nakaikyas ang maong mga suspek pinaagi sa paghimo og buslot sa kisame sa bartolina asa sila nakapriso.
Alayon niini, nagmugna gilayon ang mga awtoridad og tracker team nga gilangkuban sa hiniusang puwersa sa PDEA Regional Office 9 ug Zamboanga City Police Office alang sa hinanaling pagkasikop sa nasangpit nga mga piniriso.
Naila ang maong mga piniriso nga sila si Wilson Indanan Sahiban, Junjimar Hajili Aiyob, Jimmy Angeles Sahibol, Kerwin Mohammad Abdilla, Albadir Mala Ajijul, Muhajiran Romeo Jumlah, ug Amil Khan Mahadali Abubasar.
Nasayran nga dungang nasikop ang mga suspek sa gipahigayong buy-bust operation sa mga operatiba sa Barangay Mampang, Zamboanga City niadtong Mayo 3, 2024, diin nakuha gikan sa mga niini ang 21.4 kilos nga shabu, diin gibanabanang mobalor sa Php145.5 Milyones.
