BUTUAN CITY- Nagpabiling malaumon ang pipila ka kongresista nga paboran sa Korte Suprema ang motion for reconsideration sa Kamara kalabot sa impeachment batok kang Vice President Sara Duterte, nunot sa pamahayag sa Senado nga andam gilayon kining sugdan ang trial ugaling tugotan.
Sumala ni Tingog Party-list Rep. Jude Acidre, nga gihuwatan sa Kamara ang desisyon sa SC sa mosyon nga nagtinguhang balihon ang 2025 ruling nga mingbabag sa proceedings.
Niadtong Hulyo 2025, gidiklara sa SC nga unconstitutional ang ika-upat nga impeachment complaint batok kang Duterte ug gibawal ang pagdawat og bag-ong reklamo hangtud Pebrero 6, 2026.
Gitumbok usab ni Lanao del Sur Rep. Zia Alonto Adiong nga procedural lang ang gitumong sa SC ug dili ang substance sa reklamo. Sigon pa niini nga nangandam matud pa ang Kamara sa rules nga motado sa final ruling sa korte.
