BUTUAN CITY – Tulo ka mga persons of interest na ang naaresto sa kapulisan sa Hong Kong nga gitu-uhang duna’y kalabutan sa brutal nga pagpatay kang Abby Choi, ang 28-yanyos nga Chinese fashion model ug social-media influencer kinsa gi-ihaw, giputol-putol ang nagkada-iyang parte sa lawas.
Ang ngilngig nga pagpatay kang Choi mao ang pinaka-init nga balita karon sa Hong Kong nga gisakyan sa mga international media outlets rason nga nahimong dakong balita na usab sa tibuok kalibutan.
Nasayrang napalgan ang putol nga batiis ni Choi sulod sa refrigerator sa apartment nga gi-abangan sa iyang father-in-law kinsa usa ka pulis.
Ang bana ni Choi nga si Alex Kwong ug mga kabanay niini ang gidudahang mihimo sa krimen.
Nadiskubrehan sa Hong Kong Police niadtong Biyernes, Pebrero 24, ang mga parte sa iyang lawas nga gisulod sa fridge ingon man ang ID card, credit cards ug uban pang mga gamit ni Choi kinsa katapusang nakit-ang buhi niadtong Martes, Pebrero 21.
Nakita niadtong Sabado sa Hong Kong Police sa gi-abangang balay sa ugangan ni Choi ang mga meat grinder, chainsaws, gloves, masks, dihang misulay kini sa pagsibat.
Gawas kang Kwong, nabilanggo na usab ang maguwang niini ug mga ginikanan.
Migawas sa report sa South China Morning Post, nga ang ugangan ni Choi ang utok sa planadong pagpatay sa fashion model nga nag-ugat matud pa sa kwarta tungod sa panaglalis sa duha ka panig kabtangan nga nagkantidad og $12 million nga planong ibaligya sa biktima.
Hangtud sa pagkutlo niini nga balita, padayon pang gipangita ang ulo sa biktima.
