BUTUAN CITY – Pakyas nga makita sa atong mga Muslim brothers dinhi sa siyudad sa Butuan kaganina ang crescent moon nga maoy tima-ilhan nga sugdan gilayon unta ugmang adlawa ang pag-obserba sa Balaang buwan sa Ramadan.
Sa eksklusibong pakighinabi sa Bombo Radyo Butuan, gipadayag ni Sultan Gamal Amerol, tigpamaba sa National Commission for Muslim Filipinos kon NCMF-Caraga, ang balaang buwan sa Ramadan usa lang sa lima ka mga pillars sa Islam nga angayan nilang sundon. Dinhi magpu-asa sila sa pagkaon, pag-inom, pakighilawas, paghimo og dautan gikan sa pagsubang sa adlaw ug makakaon lang sila kung musalop na ang adlaw.
Nakatutok usab sila sa pag-ampo kang Allah ug pagbasa sa Kor’an ingon man pagtabang sa labing nanginahanglan.
Alang usab sa mga mu-apil sa Hajj pilgrimage sa Mecca, gipadayag ni Amerol nga wala pa’y nag-apply niini nga taga-Caraga Region apan bukas sila sa pagdawat niadtong desididong mag-Hajj.
Daghan matud pa nga paagi nga ipakita sa mga Muslim ang pagtabang sa isi’g katawo ilabina kadtong nanginahanglan tungod kay kini matud pa ang ikahimuot og maayo ni Allah.
Samtang human sa usa ka buwan nga selebrasyon sa buwan sa Ramadan, magpista na sila pinaagi sa pagsawo sa ilang mga andam nga pagkaon.
