BUTUAN CITY – Gipa-ilalom na sa state of calamity ang lungsod sa Hinatuan, Surigao Del Sur, ang epicenter sa magnitude 7.4 nga linog niadtong Sabado sa gabii tungod sa damyos nga hatud niini.
Kini pinaagi sa Resolution Number GC-621 Series of 2023 nga gi-aprubahan sa Sangguniang Bayan sa Hinatuan atol sa special session nga gipangunahan ni Vice Mayor Atty. Tito Cañedo III.
Una nang gisugyot ni Municipal Mayor Titing Garay, chairman sa Municipal Disaster Risk Reduction and Management Council kon MDRRMC ang pagpa-ilalom sa ilang lungsod sa state of calamity aron mapakusgan pa sa municipal government ang pagtubag sa hinanaling kinahanglanon sa mga apektadong residente ilabina ang dinaliangng pagrekober niini gamit ang ilang calamity fund.
Nasayrang muabot sa 11-mil ka mga pamilya kon 41-mil ka mga indibidwal ang apektado sa kusog nga linog sa maong lungsod.
Samtang gibana-banang 88-milyones pesos usab ang damyos sa mga nagubang balay sa 24 ka mga barangays.
