BUTUAN CITY – Hinanaling tabang ang gipanawagan karon sa mga residente sa Brgy. Siana, Mainit, Surigao del Norte human nanghikling sa mga evacuation centers tungod sa nasinatiang pagdahili sa yuta atul sa pagbusikad sa tailings storage facility sa mining company nga Greenstone Resources Corp kansa rason sa pagkadamyos sa kapin gatos ka mga panimalay.
Nanawagan ang mga residente nga maplastar sila pagdali ilabina karon nga lisod ang ilang kahimtang sa mga evacuation centers tungod sa kainit sa panahon. Alayon niini, nanawagan usab sila sa Department of Environment and Natural Resources kon DENR nga susihon ang Greenstone Resources Corp. ug patubagon ang maong kompanya tungod sa kadaot nga hatud niini ngadto sa katawhan sa nasangpit nga Barangay.
Sumala sa apektadong residenteng si Rehina Mahinay, dugay na nilang gikabalak-an ang maong panghitabo sanglit wala man nagbali-bali ang nasangpit nga mining company sa tambak sa ilang tailing facility nga halos dungawan na lang ang kabalayan.
