BUTUAN CITY – Tungod sa gilauman nga grabeka-init sa panahon, gisugdan nang subling ipatuman sa Metropolitan Manila Development Authority (MMDA) ang 30-minuto nga “heat-stroke break” sa mga traffic enforcer.
Sa nasangpit nga patakaran, makabaton og 30-minutos nga pahulay gikan sa pagkabulad sa adlaw ang mga ginsakpan sa MMDA nga nagtrabaho og walo ka oras sa pagpahapsay sa trapiko.
Kagahapong adlawa, gipangunahan ni MMDA Chairman Atty. Don Artes ang pagpanghatag sa mga galon sa ilimnong tubig, insulated ug reusable water bottles sa mga ginsakpan sa MMDA Timog Base sa Quezon City aron iduso ang responsibilidad sa palibot.
Napatuman kini pinaagi sa suporta sa mga water concessionaires nga Maynilad Water Services, Inc. ug Manila Water Company, Inc., nga nakigsosyo sa MMDA sa paghatag og ilimnong tubig.
Sigon ni MMDA General Manager Usec. Nicolas Torre III nga tanang base sa MMDA hatagan og ilimnong tubig aron matabangan ang mga ginsakpan nga magpabiling hydrated samtang naka-duty.
