BUTUAN CITY – Pormal nang salaon sa imbestigasyon sa Senate Blue Ribbon Committee si kanhe Ilocos Sur Governor Luis Chavit Singson aron maghatag og pagklaro sa isyu sa mga maanomalusong flood control projects sa nasud.
Kini human gikumpirma ni Senate President Pro Tempore Panfilo Lacson, ang panel chairman, nga gidawat sa iyang komite ang boluntaryong paghanyag og kanhe gobernador nga motestigo.
Sumala sa senador, mismong si Singson ang nagpadala og sulat ug miadtu sa iyang opisina niadtong Lunes aron ipaabot ang iyang intensyon.
Bisan og dili pa ipailalom sa pormal nga vetting o pagsusi ang mahimong testimonya ni Singson, gitin-aw ni Lacson nga gelayon niyang gitugutan ang hangyu human makaseguro nga nakasentro ang pamahayag sa nasangpit nga kontrobersiya.
Gipamugos usab sa panel chair nga bisan og walay gisubmiteng affidavit, igo na ang kalambigitan sa pamahayag ni Singson sa gihimong imbestigasyon.
Temporaryong gitakda sa komite ang musunod nga pagdungog sa Abril 14 apan mamahimo pa kining mapasayu.
Samtang gipahayag usab ni Lacson nga tunga ang mga miyembro sa komite kung ipatawag ang 18 ka kanhe Marines.
Ang nasangpit nga grupo miangkon nga naghatod matud pa og P805 bilyones pesos nga cash gikan sa pondo sa flood control projects padulong sa nagkadaiyang indibidwal.
Sumala sa senador, dunay mga misupak sa pagpatawag sa mga kanhe militar tungod kay basin makagubot lang kini sa dagan sa imbestigasyon.
