BUTUAN CITY – Gibasura sa Court of Appeals (CA) ang hangyo sa kompanyang konektado sa Kabus Padatoon kon KAPA Community Ministry International Inc. nga matangtang sila sa freeze order ug bank inquiry human gimando ni Pangulong Rodrigo Duterte ang pagpasira sa ministry.
Partikukar nga gibasura sa CA ang plea sa Hawkson’s Truck and Parts Center nga nakabase sa General Santos City nga unang mihangyong tangtangon ang freeze order ug bank inquiry nga gi-isyu batuk kanila.
Ang desisyon gisulat nila CA Justice Rafael Santos, Chairperson Mariflor Punzalan-Castillo ug Senior Member Danton Bueser.
Una nang nag-isyu ang CA og resolusyon alang sa pag-isyu og freeze order ingon man bank inquiry sa P100 million assets sa KAPA apil sa ilang mga officers ug members ug mga kompanyang konektado sa KAPA.
Gipamugos kaniadto sa maong kompanya nga wala’y legal ug factual basis aron i-apil sila sa freeze order kansa gi-isyu aron masigurong dili mawala ang mga assets sa KAPA..
Nasayrang apil sa bank inquiry ang assets sa KAPA sa Bank of Philippine Islands ug sa Banco De Oro.
