BUTUAN CITY – Gibasura sa Pre-Trial Chamber I sa International Criminal Court (ICC) ang apela sa defense team ni kanhi Presidente Rodrigo Duterte nga baliktaron ang desisyon nga fit for trial siya sa ma kasong iyang gi-atubang subay na sa iyang gipatumang war on drugs.
Sa desisyon nga gipagawas kagahapon, Pebrero 13, gibutyag sa chamber nga ang argumento sa depensa nga mahimong mugrabe ang pagkaluya sa kanhi presidente samtang magpadayon ang pagtaral, pulos lang mga espekulasyon.
Giklaro usab sa ICC nga ang naha-unang desisyon niini niadtong Enero 26, bahin sa iyang kapasidad nga motubag sa pre-trial proceedings dili pa final nga paghukom sa iyang kakapas nga mosalmot sa mismong pagtaral.
Una nang gibutyag sa kampo ni Duterte nga dili makatarungan ang proseso ug gibalewala ang “objective facts” sa paghinay na sa iyang memoriya.
Nagpahimangno pa ang depensa nga mahimong maapektuhan ang proseso kung ipadayon ang confirmation of charges hearing samtang dili hingpit nga magamit ni Duterte ang iyang mga katungod. Tungod sa desisyon sa ICC, gilauman nga magpadayon ang kaso ug magsugod ang confirmation of charges hearing sa Pebrero 23.
