BUTUAN CITY – Gikumpirma ni Israeli Prime Minister Benjamin Netanyahu nga napatay sa ilang mga sundalo si Mohammed Sinwar, usa sa mga lider sa Hamas sa Gaza, atol sa gihimong airstrike sa Khan Younis, southern Gaza.
Si Sinwar, gi-ilang usa sa mga importanteng target sa operasyon militar sa Israel, diin gigamit ang mga bunker-busting bomb aron gubaon ang mga underground tunnel ug pasilidad sa Hamas.
Siya usab ang igsoon ni Yahya Sinwar, ang mastermind sa pag-atake sa Israel niadtong Oktubre 7, 2023, diin daghang kinabuhi ang nakalas.
Matod ni Netanyahu, ang kamatayon ni Mohammed Sinwar, usa ka dakong kadaugan alang sa Israel ug timaan sa sinugdanan na sa pagtapos sa giyera batok sa Hamas.
Kini maghatag og higayon sa katawhan sa Gaza nga makalingkawas sa ilang dugay na nilang nasinatiang pagpanglupig. Bisan pa sa maong kalampusan, nagpabiling tensyonado ang kahimtang sa rehiyon samtang nagpadayon ang military operations sa Israel.
